පරිසර අධ්‍යයන කාර්ය සැසියකදී පොල් පිලිබඳ ගැටළුවක් ............( 1 - කොටස )

පරිසර අධ්‍යයන කාර්ය සැසියකදී පොල් පිලිබඳ ගැටළුවක් ඔස්සේ ගොඩ නැගුනු රසවත් තොරතුරු රැසක් .........( 1 - කොටස )

එක්තරා පරිසර අධ්‍යයන සැසියකදී උසස් පෙළ සිසුන් කණ්ඩායමකට  ගැටළු කිහිපයක් සඳහා විද්‍යාත්මක හේතු සැපයීම පිණිස පැවරුම්‌ දෙන ලදී. මෙයින් එක්‌ පැවරුමක් වූයේ, 

‘ලෙලි ගැසු පොල් ගෙඩියක ඉහල පැත්තේ දකින්නට ලැබෙන ඇස් තුන’ ගැන විද්‍යාත්මක තොරතුරු’ දැක්වීමයි.

තවත් කණ්ඩායම් කිහිපයකට එවැනි පැවරුම් මාතෘකා ලබාදෙන ලදී. මෙම පැවරුම්  පැය දෙකකදී අවසන් කර වාර්තාවක්ද පිළියෙළ කල යුතු විය. ( ඒ කාලයේ අද මෙන් අන්තර්ජාල පහසුකම් නොතිබුණු නිසා සිසුනට කරුණු සෙවීමට තිබුනේ පොත් පත් පමණකි.)

පොල් පිළිබඳව  සිසුන් විසින් ඉදිරිපත් කරණළද වාර්තාව බොහෝ දුරට සම්පුර්ණ එකක් විය.  ලබාගත් තොරතුරු  සැකෙවින් මෙසේය: (විස්තරය සමග අඳින ලද රූප සටහන් කිහිපයක්ද විය)

“පොල් පුෂ්ප මංජරියේ, පුං සහ ජායා (male and female)  පුෂ්ප එකම කිනිත්තේ හෝ වෙන වෙනම කිනිතිවල හට ගනි.  ජායා පුෂ්පය කෝෂ්ඨ හෝ අන්ඩප (carpels) තුනකින් යුක්තය, මෙම කෝෂ්ඨ තුනෙහිම වෙන වෙනම ඇති ජායා ජන්මාණු තුනටම පුං ජන්මාණු (male  gametes) සමග සංසේචනය වීමට හැකියාව් තිබේ. එහෙත් පරාගණයෙන් පසු ස්වභාවයෙන්ම සාර්ථක සංසේචනයක් සිදුවනුයේ එක කෝෂ්ඨයක පමණකි. සංසේචනය සාර්ථකව සිදුවූ කෝෂ්ඨයේ කළලයක්‌ සෑදී වර්ධනය වේ. මේ අතර සාර්ථක  සංසේචනය සිදු  නොවූ ඉතිරි කෝෂ්ඨ දෙක  වර්ධනය නොවී රෝධනය වී යයි මේ නිසා අවසානයේදී පොල් ගෙඩියේ ‘බීජ’ එකක් පමණක් දකින්නට ලැබේ.

කෙසේ වෙතත් පොල්  ජායා පුෂ්පයේ ඩිම්බ් කෝෂයේ ‘බීජ’ තුනක් හටගැනීමට හැකිවන මුලික ඩිම්බාණු ලක්ෂණ තිබේ. පරිණත පොල් ගෙඩිය ඒක බීජක ඵලයක් ලෙස දකින්නට ලැබුනත් එහි ඩිම්බ් කෝෂ අවස්ථාවේදී  තිබුණු ලක්ෂණ කිහිපයක් පරිනත අවස්ථාවේදීද දකින්නට ලැබේ. බීජයේ ‘ඇස්’ තුන මෙයින් එක් ලක්ෂණයකි. එයින් හොඳින් වර්ධනය වී තිබෙන ‘ඇස’, ප්‍රරෝහණයේදී බීජ පැලය පිටතට පැමිණෙන විවරය යි. මෙම ද්වාර දැක්වෙන රුපයක් සහ පොල් බීජයක බීජ පැළය හටගන්නා ආකාරය පෙන්වන රුපයක් පහත දැක්වේ             

                                  

                                                         

                             පොල් බීජයේ ‘ඇස්’ තුන                           ප්‍රරෝහණය වන පොල් බීජයක්                                (මෙම රුප සටහන් අන්තර්ජාලයෙනි)

අධ්‍යයනය සඳහා ගෙනවිත් තිබුණු  පොල් මල් කිනිත්ත, ලෙලි සහිත පොල් ගෙඩිය සහ ලෙලි ගැසූ පොල්ගෙඩිය හොඳින් නිරීක්ෂණය කිරීමෙන් පසු, ඒ ගැන මෙතෙක් නොදත් කරුණු වටහාගත් සිසු සිසුවියන් මහත් අමන්දානන්දයට පත්විය. පොල්වල උද්භිද විද්‍යාත්මක නාමය  Cocos nucifera  වේ.

පැවරුම අවසන් කළ පසු පැවති  සාකච්ඡා වාරයේදී සිසුන් විසින් වැදගත් ප්‍රශ්න කිහිපයක් ඉදිරිපත් කරන ලදී. ‘පොල්’ කණ්ඩායමෙන් ඉදිරිපත් කළ ප්‍රශ්න මේවාය

1. පොල් (බීජය) බිඳීමේදී, බෑ දෙකක් පහසුවෙන් වෙන්කර ගැනීම සඳහා මන්නයකින් හෝ වෙනත්                     මෙවලමකින්, තද පහරක් එල්ල කළ යුතු නියමිත ස්ථානයක් තිබේද?  
2. ‘දෙබිඩි පොල්’ විශේෂයක් ගැන සඟරාවක කියවන්නට ලැබුණි. ඒ අනුව් එය විශ්මය ජනක,                             ඉතාමත් විරල  ගුප්ත දෙයක් බවත් සඳහන් විය. එසේනම් එය 'එලොව පොල්ද'?                                             

     මෙයින් පළමුවන ප්‍රශ්නයට පිලිතුරක්‌ සැපයීමට පැමිණ සිටි ජෙෂ්ඨ ගුරු මහත්මයෙක් ඉදිරිපත් විය. ඔහු පවසන ආකාරයට ලෙලි ගැසූ පොල් ගෙඩියේ  ‘සක්‍රීය’ සිදුරට විරුද්ධ පැත්තේ තිබෙන දාරයේ මැදට තදින් පහරක් ගැසූ විට බෑ දෙක එක සමානව බිදී යයි. පැරැන්නන් විසින් ආයුධයක් නොමැතිව වුවද පොල් බිදීමට මෙම ක්‍රමය භාවිත කර තිබෙනු ඔහු දැක ඇත.

අත්දැකීමෙන් පමණක් දන්නා මෙය මෙතෙක් විද්‍යාත්මකව තහවුරු කර තිබේදැයි විස්තර කිරීමට ප්‍රමාණවත් තොරතුරු අප සතු නොවීය.පසු කලකදී  අන්තර්ජාලයෙන් ලබාගත් මෙවලමක්  නොමැතිව පොල් ලෙලි ගැසීම සහ පොල් බිඳීම පැහැදිලි කරණ වීඩියෝ පටය පහත දැක්වෙන ඈඳියෙන් (link) ලබා ගත  හැකිය. මෙහිද එම දාරය ගැන සඳහන් කර තිබේ.

https://www.google.com.au/url?sa=t&rct=j&q=&esrc=s&source=web&cd=1&cad=rja&uact=8&ved=0ahUKEwjn4rGerNLTAhUIHZQKHWJFDJoQtwIIJjAA&url=https%3A%2F%2Fwww.youtube.com%2Fwatch%3Fv%3DT9bXoOa1qTg&usg=AFQjCNG8wReInfKqegV8c_5MFLQR0YrRoQ&sig2=Ro121PZF2T7Enr3EDvjgKg

සිසුන්ගේ දෙවන ප්‍රශ්නයට පිළිතුරු සැපයීමට මම ඉදිරිපත් වීමි. දෙබිඩි පොල් වල නිජ භුමිය වන සීෂෙල්ස් (Seychelles) දුපත් රාජ්‍යයේ ගුරු පුහුණු ආයතනයක මට වසර කිහිපයක්  සේවය කිරීමට හැකිවිය. එරටෙහි ඉතාමත් ආකර්ශනීය භාන්ඩයක් වන ‘දෙබිඩි පොල්’ ගෙඩියක් මට එහිදී තෑගී වශයෙන් ලැබිණ.

මම,  වහාම කිට්ටුව තිබුණු අප ගෙදරට පණිවුඩයක් යවා  ‘දෙබිඩි පොල්’ ගෙඩිය ගෙන්වා ගෙන ඒ ගැන දීර්ඝ විස්තරයක් කළෙමි.

(‘දෙබිඩි පොල්’  යනු  'එලොව පොල්ද'?   ඒ  පිලිබඳ ගුප්ත  තොරතුරු   2 කොටසින්)   

                                          .